Chenero cinematografico

Un u más biquipedistas son treballando actualment enamplando iste articlo. Puede estar que, por ixo, bi haiga lagunas de conteniu u deficiencias de formato. Por favor, antis de realizar correccions mayors u reescrituras, contacte con éls en a suya pachina d'usuario u a pachina de discusión de l'articlo ta poder coordinar-ne la redacción.

Un chenero cinematografico ye una forma de clasificar una cinta seguntes a suya tematica u ambientación cheneral y la función principal d'a dita clasificación ye fer que lo posible espectador antis de veyer a cinta pueda conoixer dita tematica. Tamién fa que los estudiosos u aficionaus a lo cine puedan extrayer caracteristicas chenerals comuns a todas as cintas que comparten un chenero.

Os cheneros cinematograficos no son una clasificación zarrada y quedan ubiertos a bels cambios que mesmo pueden clasificar-se como "modas". Asinas, dende lo sieglo XXI ha apareixiu un chenero nuevo que dica l'inte no yera considerau, como ye lo cine de superherois, que ha teniu prou exito dende la suya aparición, y cheneros cinematograficos como lo cine negro, que tenioron una gran expansión en os primers anyos dende la suya aparición en os anyos 1930 practicament desapareixioron (encara que posteriorment apareixió lo clamau "cine neonoir") vinte u trenta anyos dimpués.

Bels cheneros son consideraus por unanimidat como cheneros chenuinos y con persistencia en o tiempo, como lo cine de comedia, lo cine de drama, lo cine de western, o cine de romance u lo cine belico, pero d'atros quedan subchectos a interpretacions u modas (como lo cine de superherois de que ya hemos charrau, pero tamién o cine de vampiros, por eixemplo). U lo caso d'o cine d'acción, que puet considerar-se que no amaneixió que dica los anyos 1980.

Tamién cal considerar que bien pocas cintas fan parte exclusivament d'un solo chenero, podendo existir por eixemplo cintas de western comicas mesmo que cintas de western dramaticas, y cualsiquiera d'istas dos puet tamién estar u no consideradas como cine de romance. De feito, mesmo cheneros tan aparentment antiteticos como lo cine de drama y lo cine de comedia pueden coexistir en a mesma cinta, que se clasica como de "comedia dramatica".

Y si ya ye bien complexa la deseparación entre bels cheneros cinematograficos encara lo ye mas la clasificación en subcheneros, que mesmo fa que bellas clasificacions nian tiengan nombre en atros idiomas fuera d'o nombre en anglés ("buddy film", "slasher", etc).